პ ი ც ა

პიცის მომზადებას ვიწყებ ცომით. ჯამში ვყრი ფქვილს, ვაკეთებ შუაში ჩაღრმავებას, ვყრი საფუარს და მარილს და ვასხამ საშუალოზე მეტად თბილ წყალს!! (ცივი წყლით არ გაფუვდება ცომი, ზედმეტად ცხელი კი საფუარს დააკარგვინებს გაფუების თვისებას) ვზელ ვიდრე არ მივიღებ ელასტიურ ცომს, ბოლოს შევაზელ ზეითუნის ზეთს და ცომი უკვე ხელზე აღარ მეკრობა. ამის შემდეგ 2-3 წუთი ცომის გუნდას ვასვენებ და კიდევ რამდენჯერმე გადავზელ. ფქვილმოყრულ ფიცარზე ვათავსებ ცომს და ზემოდან ვაფარებ ჯამს, რომ იყოს თბილად და ჰერმეტულად დაცული. გაფუებას ჭირდება დაახლოებით ერთი საათი.

გაფუებულ ცომს კიდევ ერთხელ ჩავზელ და ვყოფ შუაზე. ერთ გუნდას ხელით ვაბრტყელებ ისე, რომ ცომიდან ჰაერი კარგად გამოვდევნო. ვაგრძელებ გაბრტყელებას ვიდრე არ მივიღებ სასურველ მრგვალ ფორმას და ვათავსებ პიცის საცხობ ფირფიტაზე, რომელზეც ცოტა ფქვილს ვაყრი რომ არ მიიკრას ცომმა. მთლიან რკალზე ვასხამ ზეითუნის ზეთს, ხელით ვანაწილებ მთელ სიბრტყეზე და ვამატებ პომიდორის სოუსს.

პომიდორის სოუსს პიცისთვის ძალიან მარტივად ვამზადებ. ვრეცხავ პომიდორს, მჭრელი დანით თითოეულს პატარა ჯვრის ფორმაზე დავსერავ და ვასხამ მდუღარე წყალს. დაახლოებით 2 წუთში პომიდორს მარტივად ვფცქვნი და ვჭყლიტავ ხელით(იტალიელები ასე გვირჩევენ).

პიცაზე განაწილებულ პომიდვრის სოუსს ზემოდან ვაყრი ბაზილიკის რამდენიმე ფოთოლს და ვდებ 220 გრადუსზე გახურებულ ღუმელში. როდესაც ცომი თითქმის ბოლომდე გამოცხვება, ვაყრი გახეხილ მოცარელას და მთლიან ნაჭრებს. 3-4 წუთში ყველი დადნება და პიცაც მზადაა!!!

პ.ს. იგივე პრინციპით ვამზადებ პიცას პეპერონით.

Buon Appetito ❤️